Chuqur qoʻllanma · darslikdan alohida
Chatda siz soʻraysiz, u yozadi, qolganini oʻzingiz qilasiz. Agentda siz topshirasiz — u qidiradi, oʻqiydi, yozadi, tekshiradi va tayyor ishni qaytaradi.
Ikkalasining ichida bir xil model turadi. Farq — modelga qoʻl berilganida.
Siz yozasiz — u javob qaytaradi. Undan keyingi hamma narsa sizniki: manbani topish, matnni fayllarga joylash, formatlash, joʻnatish. U sizning papkangizni ham, kanalingizni ham koʻrmaydi.
Bitta savolga bitta javob kerak boʻlsa — chat yetadi va u eng tezi.
Siz topshirasiz — u ishni bosqichma-bosqich olib boradi. Fayl ochadi, internetdan qidiradi, yozadi, oʻz ishini tekshiradi va kerak boʻlsa qaytadan qiladi. Har qadamda sizdan soʻrab oʻtirmaydi — chegaralarni oldindan siz belgilab qoʻygansiz.
Ish koʻp bosqichli boʻlsa yoki takrorlanadigan boʻlsa — agent.
Oltita haqiqiy ish. Har birida yonma-yon: hozir qanday qilyapsiz va agent bilan qanday boʻladi. Foyda shu ikki ustunning farqida koʻrinadi.
Nima yutasiz. Beshta bosqichdan siz faqat oxirgisini qilasiz. Qolgan toʻrttasi — konveyerda.
Natija shunday koʻrinishda chiqadi.
Bu — Cowork tayyorlagan haftalik hisobot: koʻrsatkichlar, diagrammalar va tayyor xulosalar. Siz mavzuni va manbani bergansiz, qolganini u yigʻgan.
Skrinshot: Anthropic — claude.com
Agent sizdan tez yozgani uchun emas — sizning zimmangizdagi bosqichlar soni kamaygani uchun foyda beradi. Beshta bosqichli ishda siz bittasini qilib qolsangiz, tejalgan vaqt oʻsha toʻrt bosqichga ketadigan diqqatdir.
Shuning uchun birinchi savol «qancha tez?» emas, «qaysi bosqichlarni topshira olaman?» boʻladi.
Terminal koʻrmagan boʻlsangiz — Claude Desktop. Yettita qadam, taxminan yigirma daqiqa. Havolalar rasmiy manbaga olib boradi.
Terminal koʻrmagan odam uchun — sizga shu
Kompyuterga oʻrnatiladigan dastur. Uchta boʻlimi bor: **Chat** — oddiy suhbat, **Cowork** — ishni topshirib ketadigan joy, **Code** — oʻz papkangizda nazorat bilan ishlaydigan joy. Oxirgi ikkitasi ham fayl bilan ishlaydi va ikkalasi ham sizga yaraydi.
Terminalda ishlashga oʻrgangan boʻlsangiz
Buyruq satridan ishlaydigan variant. Xuddi shu dvigatel, faqat oynasiz. Ikkalasini bir vaqtda bitta papkada ishlatsa boʻladi — sozlamalari umumiy.
Uchtasidan ikkitasi fayl bilan ishlaydi va ikkalasi ham sizga yaraydi. Tanlov ish turida emas — qancha nazorat va takrorlanuvchanlik kerakligida.
Ishni topshirib qoʻyasiz va ketasiz. U alohida muhitda oʻzi ishlaydi, siz boshqa narsa qilib turasiz.
Oʻz papkangizda, oʻz qoidalaringiz bilan ishlaydi. Har oʻzgarishni koʻrib turib tasdiqlaysiz.
U dastur yozish uchun emas — fayl bilan ishlaydigan agent. Fayl esa matnli qoralama, jadval yoki dars rejasi boʻlishi mumkin — kod boʻlishi shart emas. Skrinshotdagi topshiriqlar dasturchilarga moʻljallangan, chunki rasm dasturchilar uchun olingan — bu boʻlimning chegarasi emas.
Bu qoʻllanmadagi hamma jiddiy narsa aynan shu boʻlimda ishlaydi: yoʻriqnoma fayli, namunalar papkasi, toʻrt bekatli konveyer, oʻz agentlaringiz va ruxsat rejimlari. Cowork sodda, Code esa kuchliroq va takrorlanadi.
Fayllaringizga umuman tegmaydi. Bitta savolga bitta javob kerak boʻlganda eng tezi: sarlavha variantlari, qisqa tahrir, atama izohi. Agent emas — shuning uchun bu qoʻllanmada undan koʻp gapirilmaydi.
Skrinshotlar: Anthropic'ning rasmiy qoʻllanmasidan — claude.com. Dastur yangilanib turadi, shuning uchun tugmalar joyi biroz farq qilishi mumkin.
Quyidagilar — oʻsha skrinshotlardan kesib olingan haqiqiy boshqaruvlar. Ekranda nimani qidirishingizni bilib olasiz.
Uchta boʻlim — eng tepada
Oyna ochilganda birinchi shu koʻrinadi. Ishni topshirib ketmoqchi boʻlsangiz — «Cowork», oʻz papkangizda nazorat bilan ishlamoqchi boʻlsangiz — «Code».
Topshiriq qatori
Oʻrtadagi katta oyna. Chapdagi «+» — fayl biriktirish va buyruqlar. Oʻngda model nomi turadi: bosib almashtirasiz.
«Work in a folder» — papkani biriktirish
Topshiriq qatori ichida, chap tomonda. Shu tugma bilan agent koʻradigan papkani belgilaysiz. Yonida model, oʻng chekkada ishni boshlash tugmasi.
Ketayotgan ishlar
Bir vaqtda bir nechta topshiriq yurishi mumkin. Ular shu yerda turadi — bittasini bosib, qayerga yetganini koʻrasiz.
Sozlamalardagi ruxsat kaliti
Ruxsatlar shunday koʻrinadi: qisqa izoh va bitta kalit. Yoqilgan boʻlsa — Claude ekranni koʻra oladi; oʻchirilgan boʻlsa — yoʻq.
Chat boʻlimidagi tez tugmalar
Chat oynasida topshiriq qatori ostida turadi: kod, matn yozish, yaratish, oʻrganish va Drive'dan fayl olish.
Kadrlar Anthropic'ning rasmiy materiallaridan olingan — qoʻllanma va yordam markazi. Har biri Retina ekranda ham tiniq chiqishi uchun oʻz kengligining yarmidan katta koʻrsatilmaydi. Dastur yangilanadi — tugmalar joyi biroz siljishi mumkin.
Claude Code bepul rejada ishlamaydi. Pro, Max, Team yoki Enterprise kerak. Buni birinchi bilib qoʻying — koʻpchilik shu yerda toʻxtaydi.
→ Ishlaydigan hisob.
Yuqoridagi havoladan oʻz tizimingizga mos faylni oling va oching. macOS'da Applications papkasiga, Windows'da Start menyusiga tushadi.
→ Kompyuterda turgan Claude dasturi.
Windows'da Code boʻlimidagi mahalliy seanslar ishlashi uchun Git kerak. Mac'da bu qadam tushib qoladi — Git odatda tizim bilan birga keladi.
→ Windows'da ishlaydigan mahalliy seans.
Dasturni ochib, Claude hisobingiz bilan kiring. Keyin boʻlimni tanlang: birinchi kun uchun Cowork soddaroq — topshirasiz va ketasiz. Har hafta takrorlanadigan ish qurmoqchi boʻlsangiz Code ni oling: yoʻriqnoma, namunalar va konveyer oʻsha yerda ishlaydi.
→ Ochiq ish boʻlimi.
Papkani biriktiring: Cowork'da bu Work in a folder, Code'da esa muhitni Local qilib Select folder. Kichik va oʻzingiz yaxshi biladigan papkadan boshlang.
→ Agent koʻradigan ish maydoni.
Topshiriq qatoriga oddiy narsa yozing. Masalan: «shu papkadagi hujjatlarni koʻrib chiq va nima borligini bir betda tushuntir».
→ Birinchi javob va birinchi tasdiq soʻrovi.
Agent faylga tegmoqchi boʻlganda avval soʻraydi: qaysi fayl va nima oʻzgarishi koʻrsatiladi. Siz tasdiqlamaguningizcha fayllaringiz oʻzgarmaydi.
→ Nazorat sizda ekanini oʻz koʻzingiz bilan koʻrasiz.
Alohida sahifa
Terminal orqali ishlatish
Buyruq satrini bilsangiz — oʻsha yerda. Deyarli hech kimga kerak emas: Desktop ichida allaqachon bor.
Bu qadam tashlab ketiladi va keyin hamma narsa ishlamaydi. Papka — agentning butun dunyosi: undan tashqarida u koʻr.
Agent faqat siz koʻrsatgan papkani koʻradi. Undan tashqaridagi hujjatlaringiz, suratlaringiz va boshqa ishlaringiz u uchun umuman mavjud emas.
Papkaning ildizidagi CLAUDE.md har seansda oʻzi oʻqiladi. Papka biriktirilmasa, uni oʻqiydigan joy ham yoʻq.
Agent yozgan har bir fayl shu papkada paydo boʻladi. Nusxa koʻchirish tugaydi — natija oʻz joyida turadi.
Konveyerdagi agentlar bir-biriga fayl orqali uzatadi. Umumiy papka boʻlmasa, uzatadigan joy ham boʻlmaydi.
Agent — sehr emas, beshta qismdan yigʻilgan narsa. Bittasi yetishmasa, aynan qaysi biri yetishmayotgani natijadan koʻrinib turadi.
Bir marta yozib qoʻyiladigan doimiy qoidalar: agent qaysi rolda ishlaydi, qanday ohangda yozadi, nimani hech qachon qilmaydi. Har suhbatda qayta yozilmaydi — u fayl boʻlib turadi va oʻzi oʻqiladi.
Amalda«Sen bolalar kiyimlari doʻkonining kontent muharririsan. Auditoriya — 25-40 yoshdagi onalar. Hech qachon qichqiriq sarlavha yozma, ikkitadan ortiq emoji ishlatma, narxni oʻzing oʻylab topma.»
Boʻlmasa: har safar bir xil gapni qaytadan yozasiz va agent har safar biroz boshqacha ishlaydi. Natija barqaror boʻlmaydi.
Yetti qadam. Birinchi marta yarim soat oladi, keyin har yangi agent uchun oʻn daqiqa.
Agent fayl bilan ishlashi kerak boʻlsa — Claude Code yoki Cowork. Faqat matn kerak boʻlsa, oddiy suhbatning oʻzi yetadi va bu bosqichni tashlab ketasiz.
→ Ochilgan ish joyi.
Bitta papka: ichida namunalar, brend qoidalari, oxirgi oyning materiallari. Agent shu papkani koʻradi. Tarqoq fayl — tarqoq natija.
→ Bir joyga yigʻilgan ish materiallari.
Papkaga matnli fayl qoʻying va unga oxirgi bir haftada Claude'ga ikki martadan koʻp aytgan gaplaringizni koʻchiring. Oʻn qator yetadi.
→ Har suhbatda oʻzi oʻqiladigan doimiy qoidalar.
Oʻzingiz yozgan eng yaxshi 3-5 ta matnni alohida papkaga soling. Yomon namunani ham qoʻshing va «bunday qilma» deb belgilang — chegara shundan aniq boʻladi.
→ Sifatning koʻrinadigan oʻlchovi.
Oʻqishga ruxsat bering. Yozishni tasdiq bilan qoldiring. Oʻchirish va joʻnatishni umuman yopib qoʻying — bularni odam qiladi.
→ Xavfsiz chegaralar.
Katta ishdan boshlamang. Ertaga kerak boʻladigan bitta topshiriqni bering va natijani oxirigacha koʻring.
→ Ishlaydimi yoki yoʻqmi — aniq javob.
Nima notoʻgʻri chiqqan boʻlsa, uni chatda tuzatmang — yoʻriqnomaga qator qoʻshing. Bu bosqich hech qachon tugamaydi va agent aynan shundan yaxshilanadi.
→ Har hafta biroz kuchliroq boʻladigan agent.
Ruxsat uch darajali: oʻqish ochiq, yozish tasdiq bilan, oʻchirish va joʻnatish yopiq. Oxirgi ikkitasi qaytarilmaydi — tezlik uchun ham ochmang.
# Kim va nima uchun Men bolalar kiyimlari doʻkonining Telegram kanalini yurituvchiman. Obunachilar — 25-40 yoshdagi onalar, Toshkent va viloyatlar. # Ohang - Oddiy, issiq, «siz»lab murojaat - Qisqa gaplar. Bitta gapda bitta fikr. - Ohangni namunalar/ papkasidagi postlardan ol, taʼrifdan emas # Har doim - Narx va chegirmani faqat men bergan maʼlumotdan ol - Har postda bitta aniq harakatga chaqiruv boʻlsin - Oʻlcham haqidagi savolga qanday javob olish yoʻlini koʻrsat # Hech qachon - Qichqiriq sarlavha va BOSH HARFLI soʻzlar - 2 tadan ortiq emoji - «Hurmatli mijozlar», «Eʼtiboringiz uchun rahmat» - Narx yoki chegirma foizini oʻzing oʻylab topish - Sogʻliq yoki xavfsizlik boʻyicha daʼvo qilish # Format - Telegram: 700 belgigacha, sarlavhasiz - Instagram: 2200 belgigacha, oxirida 5 ta hashtag # Ish tartibi - Har doim avval bitta variant koʻrsat, men tasdiqlaganimdan keyin koʻpaytir - Ishonchsiz boʻlsang «bilmayman» deb yoz, taxmin qilma
kontent/
├── CLAUDE.md ← yoʻriqnoma, oʻzi oʻqiladi
├── qoidalar.md ← brend talablari, uzunroq
├── namunalar/
│ ├── yaxshi-1.md ← oʻz postingiz
│ ├── yaxshi-2.md
│ ├── yaxshi-3.md
│ └── yomon-1.md ← «bunday qilma» deb belgilangan
└── hafta-34/
├── faktlar.md ← 1-bekat chiqishi
├── qoralama.md ← 2-bekat
├── tuzatishlar.md ← 3-bekat
└── tayyor.md ← 4-bekat, siz koʻrasizAgentlar bir-biri bilan gaplashmaydi — ular fayl orqali uzatadi. Birinchi bekat faktlar.md ni yozadi, ikkinchisi oʻshani oʻqiydi. Shuning uchun har qaysi bosqichda nima chiqqanini oʻzingiz ochib koʻrishingiz mumkin.
Beshta qismning ichida eng kuchlisi. Natija «AI yozgan» boʻlib chiqsa — sabab deyarli har doim shu yerda.
«Jonli va professional yoz» — bu hech narsa demaydi. Uch dona oʻz matningiz esa hamma narsani aytadi.
Agent koʻrganini takrorlaydi. Oʻrtacha namuna bersangiz — oʻrtacha natija olasiz.
Bitta yoqmagan matnni qoʻshib «bunday qilma» deb belgilang. Chegara ikki tomondan aniq boʻladi.
Chatdagi namuna suhbat bilan birga yoʻqoladi. Fayldagisi har safar oʻzi oʻqiladi.
Yoqqan natijani namunalar papkasiga qoʻshing. Agent vaqt oʻtib yaxshilanadigan yagona yoʻl — shu.
Oltita rejim bor va ular tezlik bilan nazorat orasidagi tanlov. Rasmiy nomlari bilan beriladi — dasturda xuddi shunday koʻrasiz.
Ruxsat aynan shunday koʻrinadi.
Har bir ruxsat — qisqa nom, bir gaplik izoh va bitta kalit. Yoqilgan boʻlsa agent oʻsha ishni qila oladi, oʻchirilgan boʻlsa — yoʻq. Faylga tegishdan oldin esa alohida soʻraydi: qaysi fayl va nima oʻzgarishi koʻrsatiladi.
Quyidagi rejim shu savol qanchalik tez-tez berilishini belgilaydi.
Skrinshot: Anthropic — support.claude.com
defaultFaqat oʻqiydi
Boshlanishida va jiddiy ishda. Sukut boʻyicha shu turadi.
acceptEditsOʻqish, fayl tahriri va oddiy fayl amallari
Natijani oʻzingiz koʻrib borayotganda — tasdiq soʻrash charchatganda.
planOʻqiydi va reja tuzadi, hech narsani oʻzgartirmaydi
Katta ishdan oldin. Avval rejani koʻrasiz, keyin ruxsat berasiz.
autoHammasini, orqa fonda xavfsizlik tekshiruvi bilan
Uzoq davom etadigan ishda. Hisobingiz shartlarga mos kelsa koʻrinadi.
dontAskFaqat oldindan ruxsat berilgan asboblarni
Avtomatlashtirilgan skriptlar uchun. Roʻyxatda yoʻq narsa umuman ishlamaydi.
bypassPermissionsHammasini, hech qanday tekshiruvsiz
Rasmiy hujjat buni faqat izolyatsiya qilingan muhitda — konteyner yoki virtual mashinada ishlatishni aytadi.
«Bypass permissions» — barcha tasdiq soʻrovlarini va xavfsizlik tekshiruvlarini oʻchiradigan rejim. Agent nima qilmoqchi boʻlsa, soʻramasdan qiladi.
U sukut boʻyicha roʻyxatda koʻrinmaydi. Terminalda claude --permission-mode bypassPermissions yoki --dangerously-skip-permissions bilan ishga tushirsangiz yoki sozlamalarga permissions.defaultMode qoʻysangiz paydo boʻladi. VS Code kengaytmasida esa avval sozlamalardagi «Allow dangerously skip permissions» belgisini yoqish kerak.
Bu rejimda ham baʼzi narsalar toʻxtatadi: siz yozgan deny va ask qoidalari, tashkilot qoʻygan tasdiq talablari, va rm -rf / kabi butun diskni oʻchiradigan buyruqlar uchun himoya.
Oddiy kontent va metodik ish uchun bu rejim kerak emas. Tasdiq soʻrash charchatgan boʻlsa, «Edit automatically» yoki «Auto» ni oling — ular tezlikni beradi, lekin himoyani butunlay olib tashlamaydi.
Kontekst — agentning ish stoli. Unda joy tugasa, aniqlik pasayadi. Buni koʻradigan va boshqaradigan buyruqlar bor.
Har bir xabaringizda butun suhbat qaytadan yuboriladi.
Shuning uchun ertalab boshlangan suhbatda kechqurun berilgan bitta qisqa savol ham arzon tushmaydi. Chegaraga yaqinlashganda Claude eski qismni oʻzi qisqartiradi — seans toʻxtamaydi, lekin tafsilotlar yoʻqoladi.
Yechim oddiy: mavzu oʻzgarganda yangi suhbat oching.
/contextKontekst hozir nima bilan toʻlganini boʻlimlarga ajratib koʻrsatadi va nimani kamaytirish mumkinligini aytadi.
/compactSuhbatni qisqartirilgan xulosaga almashtiradi. /compact faqat matn variantlariga eʼtibor ber deb yoʻnaltirsa ham boʻladi.
/clearButunlay yangi suhbat boshlaydi. Boshqa mavzuga oʻtganda eng toʻgʻri harakat.
/usageSarfingizni va reja chegarangizni koʻrsatadi.
/memoryYoʻriqnoma fayllarini ochadi va tahrirlaydi.
Sakkizta odat. Uchta nuqta — taʼsiri kuchli, bitta nuqta — foydali qoʻshimcha. Birinchi uchtasi qolganlarining hammasidan koʻproq beradi.
Eski suhbat har bir yangi xabarda qayta yuboriladi. Boshqa ishga oʻtganda uni tozalash eng katta tejamkorlik.
Sonnet koʻpchilik ish uchun yetadi va Opus'dan arzon. Opus'ni murakkab, koʻp bosqichli qarorlar uchun saqlang. Mayda ish uchun Haiku.
U har seansda toʻliq yuklanadi. Rasmiy tavsiya — 200 qatordan oshmasin. Uzun koʻrsatmalarni Skill'ga koʻchiring: ular faqat kerak boʻlganda yuklanadi.
«Loyihani yaxshila» degan soʻrov agentni hamma faylni oʻqishga majbur qiladi. «Falon fayldagi ikkinchi boʻlimni qisqartir» esa bitta faylni oʻqitadi.
Plan rejimida avval reja koʻrsatiladi. Notoʻgʻri yoʻldan qaytish — bajarilgan ishni qaytarishdan ancha arzon.
Uzun jurnal yoki koʻp faylni oʻqish subagentning oʻz kontekstida qoladi, sizga faqat xulosa qaytadi.
/mcp bilan roʻyxatni koʻring. Har bir ulangan server kontekstda joy egallaydi.
Oddiy ishda /effort bilan pastroq daraja oling. Oʻylash tokenlari ham hisobga kiradi.
Bir xil koʻrsatmani ikkinchi marta yozayotgan boʻlsangiz — uning oʻrni chatda emas, faylda. Ikki xil fayl bor va ular boshqa ishni qiladi.
Papkasining nomi buyruqqa aylanadi: quyidagi fayl /haftalik-post buyrugʻini yaratadi. Faqat ishlatilganda yuklanadi, shuning uchun uzun boʻlsa ham kontekstni band qilmaydi.
--- name: haftalik-post description: Haftalik Telegram post tayyorlaydi. Foydalanuvchi «haftalik post» yoki «kanalga post» desa ishga tushadi. --- # Haftalik post 1. `namunalar/` papkasidagi 3 ta postni oʻqi va ohangni ol. 2. Foydalanuvchidan mavzu va muddatni soʻra, agar aytilmagan boʻlsa. 3. Postni yoz: 700 belgigacha, sarlavhasiz, oxirida bitta chaqiruv. 4. Emoji 2 tadan oshmasin. BOSH HARFLI soʻz ishlatma. 5. Yozib boʻlgach, eng zaif 2 ta joyni oʻzing koʻrsat.
Agentning oʻz kontekst oynasi, oʻz asboblari va oʻz modeli boʻladi. Uning oʻqigan fayllari sizning suhbatingizga tushmaydi — sizga faqat xulosa qaytadi.
--- name: tanqidchi description: Tayyor matnni tekshiradi va zaif joylarni koʻrsatadi. Matn yozilgandan keyin ishlatiladi. tools: Read, Grep, Glob model: haiku --- Sen tanqidchisan. Matnni hech qachon oʻzing tuzatmaysan — faqat koʻrsatasan. Har bir eʼtiroz uchun aniq yoz: - Qaysi gapda (gapni koʻchirib qoʻy) - Nima muammo - Nima qilish kerak Maqtama va umumiy baho berma. Eng zaif 3 ta joydan ortiq yozma.
~/.claude/skills/<nom>/SKILL.mdBarcha loyihalaringizda ishlaydi.claude/skills/<nom>/SKILL.mdFaqat shu papkada ishlaydi~/.claude/agents/<nom>.mdBarcha loyihalar uchun agent.claude/agents/<nom>.mdFaqat shu papka uchun agentMCP — bir marta kelishilgan umumiy ulagich. Notion, Asana, jadval, papka yoki oʻz tizimingiz: ulangandan keyin nusxa koʻchirish tugaydi.
# Rasmiy Notion serverini ulash claude mcp add --transport http notion https://mcp.notion.com/mcp # Ulangan serverlarni koʻrish, kirish va oʻchirish /mcp
Tayyor va tekshirilgan ulanishlar roʻyxati Anthropic Directory'da turadi. U yerdagi har qanday xizmatni xuddi shu buyruq bilan ulasa boʻladi. Ulangandan keyin /mcp bilan roʻyxatni koʻrasiz, hisobingizga kirasiz yoki ishlatmaydiganini oʻchirasiz.
Har bir ulangan xizmat kontekstda joy egallaydi. Shuning uchun keraksizini oʻchirib turing — bu tejashning bir qismi.
Bu sifat masalasi emas, narx masalasi. Javob toʻrt qatorda.
Claude oʻzbek tilini tushunadi va oʻzbekcha javob beradi. Til tanlash sifat masalasi emas.
Bir xil maʼnodagi matn oʻzbekchada inglizchadan koʻproq boʻlakka boʻlinadi. Har seansda oʻqiladigan uzun yoʻriqnoma uchun bu sezilarli farq beradi.
Kundalik suhbatni oʻzingizga qulay tilda yuriting. Uzun va har safar oʻqiladigan CLAUDE.md ni qisqa yozing — istasangiz inglizcha. Natija tili esa har doim alohida talab qilib qoʻyiladi.
«Javobni oʻzbekcha yoz» degan qatorni yoʻriqnomaga qoʻshing. Aks holda u sizning savolingiz tiliga qarab tanlaydi va aralashib ketishi mumkin.
Ishni boʻlishning beshta usuli bor va ular bir-birini almashtirmaydi. Har birining oʻz oʻrni, oʻz foydasi va oʻz narxi bor.
Ishning aniq bosqichlari bor va har bosqich boshqa mahoratni talab qiladi. Eng koʻp ishlatiladigan naqsh.
Faktlarni yigʻish → matn yozish → tanqid qilish → formatlash. Toʻrt agent, toʻrt aniq vazifa.
Har bosqichni alohida tuzatasiz. Matn yomon chiqsa — qaysi bekat aybdorligi darhol koʻrinadi.
Sozlash vaqti ketadi. Kichik ishga qoʻysangiz, foydasidan koʻra ovorasi koʻp.
Qoida. Boʻlishdan oldin ishni qoʻlda bir marta oxirigacha bajaring va bosqichlarni yozib chiqing. Bosqichlarni sanay olmasangiz — boʻlishga hali erta. 5 ta naqshning hech biri noaniq ishni aniq qilmaydi.
Haftalik kontent konveyeri: toʻrtta agent, har biriga bitta vazifa. Bekatga bosing va oʻsha agent nima olishini, nima qilishini va nima uzatishini koʻring.
Faktlarni topadi va tekshiradi
Hafta mavzusi va 5 ta manba havolasi.
Har bir manbani oʻqiydi, faktlarni sana va manba bilan yozib chiqadi, bir-biriga zid joylarni alohida belgilaydi.
Tekshirilgan faktlar roʻyxati, har birida havola.
Vazifang: quyidagi mavzu boʻyicha faktlarni yigʻ va tekshir. Mavzu: [mavzuni yozing] Manbalar: - [havola 1] - [havola 2] - [havola 3] Har bir fakt uchun yoz: - Faktning oʻzi, bitta gapda - Sanasi - Qaysi manbadan olindi Qoidalar: - Manbada yoʻq narsani yozma. Topolmasang «topilmadi» deb yoz. - Ikki manba zid boʻlsa, ikkalasini ham yoz va «ZID» deb belgila. - Xulosa chiqarma, tavsiya berma, matn yozma. Faqat faktlar roʻyxati. Natijani faktlar.md fayliga yoz.
Model tanlovi. Arzon model yetadi — bu yerda oʻqish bor, ijod yoʻq.
Konveyerning qolgan hamma qismini avtomatlashtirishingiz mumkin — yigʻish, yozish, tekshirish, formatlash. Lekin chop etish, joʻnatish va oʻchirish tugmasini odam bosadi.
Sabab oddiy: bu uchtasi qaytarilmaydi. Qolgan hamma xatoni qaytadan qilib tuzatasiz, bularni esa yoʻq.
Yettita holat. Har birida: aynan nima deyilgan va undan aynan nima chiqqan. Maslahat emas — matnning oʻzi.
“Bolalar kiyimi haqida post yozib ber”
Hech kimga tegishli boʻlmagan umumiy matn. Mavzu yoʻq, muddat yoʻq, ohang yoʻq.
“faktlar.md dagi maʼlumotdan Telegram post yoz. 700 belgigacha, sarlavhasiz, oxirida bitta harakatga chaqiruv. Ohangni namunalar/ dagi 3 ta postdan ol.”
Chop etsa boʻladigan matn. Tuzatish kerak boʻlsa ham — bitta joyda.
“Jonli va professional ohangda yoz”
«Jonli» har kim uchun boshqa narsa. Model oʻrtacha internet ohangini oladi.
“namunalar/ papkasidagi 3 ta postni oʻqi. Jumla uzunligi va murojaat uslubi oʻshalarnikidek boʻlsin.”
Ohang sizniki boʻlib chiqadi, chunki u sizning matningizni koʻrdi.
“Yoqmadi, qayta yoz”
U yana taxmin qiladi. Ikkinchi variant birinchisidan yaxshi boʻlishi shart emas.
“Ikkinchi xatboshi quruq chiqibdi. Uni mijoz beradigan savolga aylantir va javobini keyingi gapda ber. Qolgan matnga tegma.”
Faqat oʻsha joy oʻzgaradi. Yaxshi chiqqan qismlar buzilmaydi.
“Yaxshi chiqdimi?”
Deyarli har doim «ha, yaxshi» deb javob beradi. Foydasi nol.
“Bu matnning eng zaif 3 ta joyini sabab bilan koʻrsat. Har biriga: qaysi gapda, nima muammo, nima qilish kerak. Oʻzing tuzatma.”
Aniq roʻyxat olasiz va qaysi biri bilan rozi boʻlishni oʻzingiz hal qilasiz.
“Postni yoz, faktlarni tekshir va formatga sol”
Uchalasini ham oʻrtacha qiladi. Yozayotib tekshiradi, tekshirayotib yana yozadi va oxirida qaysi bosqich buzilganini bilmaysiz.
“Uchta alohida soʻrov: birinchisi faqat faktlarni yigʻadi, ikkinchisi faqat yozadi, uchinchisi faqat tekshiradi va tuzatmaydi.”
Natija yomon chiqsa, qaysi bekat aybdorligi darhol koʻrinadi va faqat oʻshasini tuzatasiz.
“30 ta dars konspektini yozib chiq”
Oʻttiztasi ham bir xil xato bilan chiqadi. Hammasini qaytadan qilasiz.
“Avval 1 ta konspekt yoz. Men koʻrib tasdiqlaganimdan keyin «xuddi shu qolipda qolgan 29 tasini yoz» deyman.”
Xato bitta nusxada tutiladi. Tasdiqlangan namuna qolgan 29 tasi uchun oʻlchov boʻladi.
“Hamma narsaga ruxsat berib qoʻyish — tez boʻlsin deb”
Bir kuni tayyor boʻlmagan matn joʻnab ketadi yoki kerakli fayl oʻchadi. Ikkalasi ham qaytarilmaydi.
“Oʻqish — ochiq. Yozish — har safar tasdiq. Oʻchirish va joʻnatish — yopiq, buni odam qiladi.”
Tezlik deyarli oʻzgarmaydi, chunki ishning 90 foizi oʻqish va yozishdan iborat.
Bu oltitasi ishlayotgan agentni professional darajaga koʻtaradi. Boshlagan kuningizdan emas, ikkinchi haftadan qoʻllang.
Yigʻuvchi va yigʻishtiruvchiga arzon model yetadi. Yozuvchi va tanqidchiga kuchlisini bering. Hammasiga eng qimmatini qoʻyish — pulni yoqish.
«Yoz va tekshir va formatla» degan agent uchalasini ham oʻrtacha qiladi. Vazifani boʻling.
Uzun suhbatni tuzatishga urinmang. Yangi suhbat oching va faqat kerakli materialni koʻchiring.
Katta ishda avval «nima qilmoqchisan, sanab ber» deb soʻrang. Reja notoʻgʻri boʻlsa, uni tuzatish natijani tuzatishdan arzon.
Chop etish, joʻnatish va oʻchirishni hech qachon avtomatlashtirmang. Qolgan hamma narsani avtomatlashtirsangiz boʻladi.
Har hafta bitta savol: natijaga qancha tuzatish kiritdim? Bu son kamayayotgan boʻlsa — agent ishlayapti.
U yozadi, tekshiradi, formatlaydi va uchalasini ham oʻrtacha qiladi. Bosqichlarni ajrating.
Eng koʻp uchraydigan xato. Natija «AI yozgan» boʻlib chiqishining asosiy sababi shu.
20 ta nusxani birdan soʻrasangiz, 20 tasi ham bir xil xato bilan chiqadi.
Bu ikkitasi qaytarilmaydi. Tezlik uchun ham ochmang.
Bir gapni ikkinchi marta yozayotgan boʻlsangiz — uning oʻrni fayl.
Bu sahifadagi har bir buyruq, bayroq va fayl nomi shu hujjatlardan olingan va 2026-yil 13-avgustda tekshirilgan. Claude Code tez yangilanadi — muhim qaror oldidan asl manbani oching.
Agent qurishdan oldin soʻrashni bilish kerak. Hech qachon ishlatmagan boʻlsangiz — darslikning birinchi darsidan boshlang, keyin shu sahifaga qayting.